أحدث أخبار المدونين :

للإشتراك فى خدمة الحصول على أحدث الأخبار على الموبايل مجانا إضغط هنا

Friday, January 4, 2008
منى الى بتحاول تكون .. وهتكون


إسمها منى , وبيقولوها يا ( مونى ) بنت قاهريه عملت لنفسها بلوج سمته " بحاول أكون " www.ba7awl-akoon.blogspot.com

دخلناه وغصنا فيه وعملنا معاها حوار عشان نقدمها لكل قراء كلمتنا كمثال للبلوجر الناجح .. تعالو نشوف قالت ايه

ليه إستخدمتى إسم "بحاول أكون " كأسم لمدونتك

عشان انا فعلاً بحاول اكون حاجة كويسة ، ولحد دلوقتي بحاول اكون عضو مؤثر في المجتمع واني اقدم من خلال المدونة مواضيع تفيد الناس

ليه فكرتى تعمل مدونه

اول حاجة وبصراحه كنت بحاول يكون ليا اصدقاء اعتمد عليهم وبعد كده حسيت ان المدونة ليها اهمية اكبر من كده بكتير واهم حاجة اني ابتديت ادقق في كل حاجة بتحصل عشان تكون موضوع انشره في المدونة واحاول اني يكون ليا وجهة نظر فيه .

وإفتتحتيها إمتى ؟

28مايو 2007

إيه أطرف المواقف التى واجهتك فى المدونة ؟

ساعات بيجيلى ردود كتيرة بعد ما بحط الموضوع فى المدونه مباشرة , والموضوع دة بيكون طريف جدا لإنى بحس إنهم كانو مستنيين إنى أحط الموضوع عشان يكتبو تعليقاتهم عنه

إيه طريقة تعاملك مع التعليقات وماذا تمثل لك هذه التعليقات ؟

انا بجد بكون مبسوطة لما حد بيعلق عندي بحس ان أي حاجة بكتبها بتعجبهم حتى ولو حاجة لحد مشهور مش بتاعتي واول لما فتحت المدونة مكنتش متوقعة ان حد ممكن يعرفها ،

هل ممكن تقفلى مدونتك فى يوم من الايام ؟ وإيه هيكون السبب ؟

ممكن اغلاقها لما احس اني فقد القدرة على اني اكتب حاجة مفيدة غير كده استحالة اقفلها لاني بقيت احس انها جزء كبير مني .

إيه موقف أهلك وأصدقائك من المدونة وهل عارفين إنك بتكتبى على النت ؟

محدش يعرف عنها حاجة من اهلي لان محدش منهم ليه علاقة بالانترنت ، اما بخصوص اصدقائي فكلهم مدونين واكيد عندهم علم بيها .

هل المدونة ساعدتك فى تنمية علاقاتك بأصحاب المدونات الأخرى ؟

ساعدتني كتير اوي وبجد استفد منها حاجات كتير اوي ـ وخلتني اطلع بأصدقاء في قمة الاحترام .

هل حدث وأصبح لك أصدقاء حقيقين تعرفتى عليهم من خلال المدونة ؟

ايوة ليا اصدقاء كتير حقيقين من خلال المدونة وبعتز جداً بصداقتهم .

لماذا تغلب الاشعار على مدونتك ؟

انا بصراحه مليش في النثر وبحسيت ان كل شعر بكتبه بيلمس حاجة جوايا وبيكتبه تحت تأثير موقف معين .

هل تمثل لك المدونة شىء أم أنها مجرد ساحة لتقضية الوقت بس ؟

اول لما فتحتها كانت بالنسبة ليا شئ عادي لكن بعد كده حسيت انها بقت مسئولية واني لازم احافظ عليها عشان خاطر الناس اللى متابعينها وبجد خلتني احس بكل حاجة بتحصل في البلد .

هل قابلتى أى مدون فى الواقع أم أن علاقتك بكل المدونين عن طريق المدونة ؟

ايوة قابلت مدونين كتير في الواقع وبجد كان احلى يوم في حياتي وعمري ما توقعت اني هعيشه او اعرف ناس زي المدونين دول وبتمنى اني اتعرف على باقي المدونين اللى متابعة مدونتهم .0

دة كان حوارنا مع منى .. عزيزى القارى.. الدعوة مفتوحه لك انك تاخد جوله فى عالم المدونات الرائع وتبعتلنا إسم المدون الى نفسك نستضيفه على صفحات كلمتنا بعد كدة

محمد حمدى

مدونه دماغى

Labels: